आदिवासी खेलो इंडियाच्या स्पर्धेसाठी ६८ जणांचा चमू

‘खेलो इंडिया’साठी महाराष्ट्र सज्ज
पालघर येथील निवड चाचणीत ६८ जणांची निवड
पालघर, ता. १३ ः आदिवासी समाजातील खेळाडूंना राष्ट्रीय, आंतरराष्ट्रीय स्तरावर संधी मिळावी, म्हणून केंद्र सरकारतर्फे पहिल्या आदिवासी खेलो इंडिया मैदानी स्पर्धेसाठी महाराष्ट्रातील खेळाडूंची निवड चाचणी कोळगाव, पालघर येथील पोलिस परेड मैदानात झाली. या निवड चाचणीतील निवडलेले ६८ खेळाडू छत्तीसगड येथील स्पर्धेसाठी महाराष्ट्राचे नेतृत्व करणार आहेत.
पालघर येथे झालेल्या निवड चाचणीचे उद्घाटन पालघरचे पोलिस अधीक्षक यतीश देशमुख यांच्या हस्ते झाले. राज्याच्या दुर्गम भागातून आलेल्या युवक युवतींची निवड चाचणी घेण्याचा बहुमान पालघरला मिळाल्याचे समाधान त्यांनी व्यक्त केले. राज्याचे नेतृत्व राष्ट्रीय स्पर्धेमध्ये करणारे हे खेळाडू राष्ट्रीय स्तरावर नक्कीच यशस्वी होतील, असा विश्वास त्यांनी व्यक्त केला.
---------------------------
राज्यातील गडचिरोली, गोंदिया, भंडारा, नागपूर, यवतमाळ, वर्धा, चंद्रपूर, अमरावती, बुलडाणा, नंदुरबार, धुळे, नाशिक, रायगड, बीड, नांदेड, जळगाव व पालघर तसेच इतर जिल्ह्यांतील आदिवासी खेळाडू निवड चाचणीसाठी पालघर येथे दाखल झाले होते. या खेळाडूंसाठी कष्ट व कौशल्य दाखवण्याची नामी संधी खेलो इंडिया आदिवासी क्रीडा स्पर्धेमधून आहे.
ः- सुहास व्हनमाने, जिल्हा क्रीडा अधिकारी