नेरूळ प्रभाग 23 मध्ये खळबळ

निवडणुकीच्या तोंडावर जादूटोण्याचा प्रकार उघड

तुर्भे, ता. १४ (बातमीदार) : नेरूळमधील प्रभाग क्रमांक २३ मध्ये ऐन निवडणुकीच्या तोंडावर एक जादूटोण्याचा प्रकार उघडकीस आला आहे. शिवसेना शिंदे गटाचे उमेदवार दिलीप घोडेकर यांच्या गाडीखाली एक रुमाल आढळून आला. त्या रुमालात त्यांना लिंबू, काळी बाहुली व बाहुलीवर थेट दिलीप घोडेकर यांचा फोटो लावण्यात आल्याचे त्यांच्या निदर्शनास आले.
यानंतर घोडेकर यांनी तातडीने ही माहिती पोलिस ठाण्याला दिल्याचे सांगण्यात येत आहे. जाणीवपूर्वक भीती निर्माण करण्यासह मानसिक दबाव टाकण्यासाठी हा प्रकार करण्यात आल्याचा आरोप येथील स्थानिक नागरिकांनी केला आहे. याप्रकरणी घोडेकर यांनी मात्र कोणतीच प्रतिक्रिया दिली नाही, परंतु या प्रकारामुळे त्यांच्या कार्यकर्त्यांमध्ये तीव्र नाराजी आहे. तसेच या प्रकरणाची सखोल चौकशी करत, दोषींवर कठोर कारवाई करण्याची मागणीदेखील घोडेकर यांच्या कार्यकर्त्यांनी केली आहे.