स्वबळाचा नारा देणाऱ्या कॉंग्रेसची वाताहत - ठाण्यात भोपळा देखील फोडता आला नाही

स्वबळाचा नारा देणाऱ्या काॅंग्रेसची वाताहत
ठाण्यात भोपळादेखील फोडता आला नाही

सकाळ वृत्तसेवा
ठाणे, ता. १६ : ठाणे महापालिका निवडणुकीत महाविकास आघाडीत सन्मानपूर्वक जागा न मिळाल्याने स्वबळाचा नारा देणाऱ्या काॅंग्रेस पक्षाची वाताहत झाली आहे. ठाणे काॅंग्रेसने पालिका निवडणुकीत ६० उमेदवार उभे केले होते. यात ठाणे जिल्हाध्यक्षदेखील उभे होते; मात्र त्यांच्या पदरीही अपयश आले आहे. काॅंग्रेसला यंदाच्या पालिका निवडणुकीत भोपळादेखील फोडता आला नाही.
ठाणे पालिका निवडणुकीच्या पार्श्वभूमीवर युतीला रोखण्यासाठी महाविकास आघाडीच्या माध्यमातून निवडणूक लढविण्याचा निर्धार राष्ट्रवादी शरद पवार, मनसे, शिवसेना ठाकरे गट आणि काॅंग्रेस यांचे एकमत झाले. जागावाटपात काॅंग्रेसने ३५ ते ४० जागांचा प्रस्ताव दिला होता. तर काॅंग्रेससाठी अवघ्या पाच ते सहा जागा सोडण्यावर आघाडीतील घटक पक्षांचे एकमत होते; मात्र जागावाटपाच्या एक दिवस आधीपर्यंत वाढीव जागेबाबत कोणताच प्रस्ताव न आल्याने नाराज झालेल्या काॅंग्रेसने आघाडीतून बाहेर पडत, स्वबळावर निवडणूक लढविण्याचा निर्णय ठाणे जिल्हाध्यक्ष विक्रांत चव्हाण यांनी घेतला. त्यानुसार ठाणे पालिकेतील ३३ प्रभागांतील १३१ जागांपैकी ६० जागांवर उमेदवार उभे करीत महायुतीसह महाविकास आघाडीला आव्हान देण्याचा प्रयत्न काॅंग्रेसने केला.