घरफोडीत पावणे दोन लाखांचे सोने चोरीला

घरफोडीत पावणेदोन लाखांचे सोने चोरीला
सकाळ वृत्तसेवा
ठाणे, ता. १७ ः दिव्याच्या दातिवली तलाव परिसरात राहणाऱ्या एका व्यक्तीच्या घरातून चोरट्यांनी पावणेदोन लाख रुपये किमतीचे सोन्याचे दागिने आणि नाणी चोरून नेल्याची घटना उघडकीस आली आहे. चोरट्यांनी किचनच्या स्लायडिंग खिडकीतून घरात प्रवेश करून कपाटातील ऐवज लंपास केला. याप्रकरणी मुंब्रा पोलिस ठाण्यात गुन्हा दाखल करण्यात आला आहे. तक्रारदार प्रमोद सोनवणे (४०) हे खासगी नोकरी करतात आणि दातिवली तलाव परिसरात एकटेच राहतात. मंगळवारी (ता. ६) सकाळी ९ वाजता ते घराला कुलूप लावून कामावर गेले होते. बुधवारी (ता. ७) सकाळी जेव्हा ते परतले, तेव्हा त्यांना घरात चोरी झाल्याचे निदर्शनास आले. सोन्याचे ब्रेसलेट, सोन्याची नाणी, लहान नाणी असा एक लाख ७० हजार रुपयांचा ऐवज चोरीला गेला आहे.