माथेरानमध्ये घरात घुसून जबरी चोरी;

माथेरानमध्ये चाकूचा धाक दाखवून लूट
कर्जत, ता. १७ (बातमीदार) ः माथेरानमध्ये जबरी चोरीची धक्कादायक घटना घडली आहे. एका वृद्ध दाम्पत्याला चाकूचा धाक दाखवून चोरट्यांनी घरातील मौल्यवान दागिने व रोख रक्कम जबरदस्तीने लुटून नेली.
माथेरान पोलिसांनी दिलेल्या माहितीनुसार, नारायण मारुती कदम (वय ७२, रा. वन ट्रिल हिल, माथेरान) हे आपल्या घरात पत्नीसमवेत होते. शुक्रवारी (ता. १६) रात्री एक अनोळखी व्यक्ती त्यांच्या दुकानात सिगारेट मागण्यासाठी आली. त्याच वेळी त्याच्या मागून आणखी तीन जण घरात घुसले. या चोरट्यांनी कदम यांच्या पत्नीला चाकू दाखवून दमदाटी केली. तसेच घरातील सोन्याचे दागिने, मोबाईल फोन व इतर वस्तू जबरदस्तीने लुटल्या. चोरीनंतर चोरट्यांनी दाम्पत्याचे हातपाय बांधून घटनास्थळावरून पलायन केले. यात चोरट्यांनी एकूण सुमारे चार लाख ३१ हजार ९०० रुपयांचा ऐवज लंपास केला आहे. याचा तपास सहाय्यक पोलिस निरीक्षक सोनोने करीत आहेत.