कल्याणातील बी . के. बिर्ला महाविद्यालयामध्ये विकिपीडिया कार्यशाळा संपन्न

बी. के. बिर्ला महाविद्यालयामध्ये विकिपीडिया कार्यशाळा
कल्याण (वार्ताहर) ः राज्य मराठी विकास संस्था आणि मराठी विभाग बी. के. बिर्ला महाविद्यालय यांच्या संयुक्त विद्यमाने मराठी विकिपीडिया परिचयात्मक कार्यशाळा उत्साहात पार पडली. या कार्यशाळेला मार्गदर्शक म्हणून राज्य मराठी विकास संस्थेचे प्रकल्प साहाय्यक विकास कांबळे उपस्थित होते. या कार्यशाळेच्या उद्‍घाटनाप्रसंगी मराठी विकिपीडियाविषयी माहिती देताना विकास कांबळे म्हणाले की, मराठी भाषेतील कोणतीही माहिती शोधण्यासाठी विश्वकोशाची मदत घ्यावी होती. विविध कोश किंवा विश्वकोशाचे खंड हाताळणे जिकिरीचे झाले होते. आज तंत्रज्ञानाच्या युगामध्ये कोणतीही माहिती शोधताना संगणकाचा उपयोग केला जात आहे. मराठी विकिपीडिया हे मुक्त ज्ञानाचे भांडार आहे. या कार्यक्रमात मोडिलिपी सहाय्यक योगेश सावंत यांनीही विद्यार्थ्यांना विकिपीडिया संदर्भातील प्रात्यक्षिक स्वरूपात मार्गदर्शन केले. कार्यक्रमासाठी डॉ. अनुप्रिया खोब्रागडे, डॉ. भाऊसाहेब ननावरे, प्रा. प्रेरणा जगताप, प्रा. रिद्धीसिध्दी गायकवाड व हिंदी विभाग प्रमुख बालकवी लक्ष्मण सुरंजे व प्राध्यापक उपस्थित होते. कार्यक्रमाच्या संयोजनासाठी डॉ. दौलतराव कांबळे व मराठी विभागाच्या विद्यार्थ्यांनी परिश्रम घेतले.