‘भारतीय साक्ष अधिनियम २०२३’वर विधी कार्यशाळा

‘भारतीय साक्ष अधिनियम २०२३’वर विधी कार्यशाळा
माणगाव (वार्ताहर) : अशोकदादा साबळे विधी महाविद्यालय व अधिवक्ता परिषद, माणगाव यांच्या संयुक्त विद्यमाने ‘भारतीय साक्ष अधिनियम २०२३’ विषयावर विधी कार्यशाळा उत्साहात पार पडली. बदलत्या न्यायव्यवस्थेत नव्या साक्ष अधिनियमाचा प्रत्यक्ष न्यायप्रक्रियेवर होणारा परिणाम ओळखून ही कार्यशाळा आयोजित करण्यात आली.
मुख्य वक्ते अ‍ॅड. सुधाकरराव आव्हाड यांनी जुन्या पुरावा कायद्याची ऐतिहासिक पार्श्वभूमी उलगडताना, नव्या अधिनियमात डिजिटल पुरावे, तांत्रिक माहिती व इलेक्ट्रॉनिक दस्तऐवजांना देण्यात आलेले कायदेशीर स्थान सविस्तर स्पष्ट केले. न्यायालयीन व्यवहारात मोबाईल मेसेजेस, सीसीटीव्ही फुटेज, ई-मेल, क्लाऊड डेटा किंवा इलेक्ट्रॉनिक लॉग्स यांना मान्य पुरावे म्हणून स्वीकारण्यास नव्या अधिनियमाने वैधता दिल्याने भविष्यातील फौजदारी व दिवाणी खटल्यांच्या निकाल पद्धतीत मोठे बदल होऊ शकतात, असे त्यांनी सांगितले.
कार्यक्रमास वकील, कायदे विद्यार्थी व पोलीस अधिकारी उपस्थित होते. उपस्थितांनी नव्या अधिनियमाचे व्यावहारिक परिणाम जाणून घेण्याची संधी मिळाल्याबद्दल समाधान व्यक्त केले.