शेकडो विद्यार्थ्यांमुळे शाळा फुलली

उरण/उलवे, ता. १८ (वार्ताहर) : विद्यार्थ्यांच्या कलागुणांना वाव देण्यासाठी आयोजित सकाळ चित्रकला स्पर्धा उत्साहात रविवारी (ता. १८) उरण एज्युकेशन सोसायटी शाळेत पार पडली. सकाळी लवकरच स्पर्धेला सुरुवात होताच परिसर रंग, रेषा आणि कल्पकतेने भारावून गेला. तालुक्यातील विविध शाळांतील शेकडो विद्यार्थ्यांनी मोठ्या संख्येने स्पर्धेसाठी सहभाग नोंदवला.

विद्यार्थ्यांनी रंगांच्या माध्यमातून परीक्षकांचे लक्ष वेधून घेतले. लहानग्यांपासून वरिष्ठ गटातील विद्यार्थ्यांपर्यंत सर्वांनीच आपल्या कल्पकतेचा उत्कृष्ट आविष्कार केला. चित्र काढताना विद्यार्थी त्या चित्रांमध्ये समरूप झाले होते, की ते चित्रच आपल्याला कसे रंगवले पाहिजे, कशा रेषा मारल्या पाहिजे हे सांगत आहे, असे चित्र पाहायला मिळाले. या स्पर्धेमुळे विद्यार्थ्यांच्या कलागुणांना प्रोत्साहन मिळाले असून आत्मविश्वास वाढीस मदत झाल्याचे शिक्षकांनी नमूद केले. या वेळी उरण एज्युकेशन सोसायटीच्या शिक्षिका सोनाली म्हात्रे, योगिता चौधरी, नैना सिंग, चित्रकला शिक्षक समीर पाटील, गणेश जाधव यांचे सहकार्य लाभले.

सकाळ माध्यम समूहाकडून स्पर्धा राबवल्यामुळे आमच्या मुलांच्या कलागुणांना वाव मिळत आहे. माझी मुलगी स्वतःहून या स्पर्धेसाठी तयार झाली असून अशा स्पर्धा होणे गरजेचे आहे.
- ज्ञानेश्वर चौगुले, पालक, कुंडेगाव

स्पर्धांमुळे मुलांचे कौशल्य वाढते. त्यांना नवी प्रेरणा मिळते आणि मुले ॲक्टिव्ह राहतात. माझ्या दोन्ही मुली गेल्या काही वर्षांपासून सातत्याने या स्पर्धेत भाग घेत आहेत.
- किरण चव्हाण, पालक