भिवंडीत घरफोडीच्या दोन घटना

भिवंडीत दोन घरफोडीच्या घटना
६.२५ लाखांचा ऐवज लंपास
भिवंडी, ता. १९ : निवडणूक आणि मतमोजणीनंतर पोलिस फौजफाटा बंदोबस्तात व्यस्त असताना, भिवंडीत चोरट्यांनी दोन वेगवेगळ्या ठिकाणी घरफोड्या करून धुमाकूळ घातला आहे. या दोन्ही घटनांमध्ये एकूण सहा लाख २५ हजार रुपये किमतीचे सोने-चांदीचे दागिने आणि मौल्यवान साहित्य चोरीला गेले आहे. शहरालगतच्या खाडीपाडी येथील देवानंद चाळीत राहणारे बालाजी बसप्पा रायफूर हे १३ जानेवारीच्या मध्यरात्री घराबाहेर असताना ही चोरी झाली. अज्ञात चोरट्याने घराचे कुलूप तोडून कपाटातील सोने-चांदीचे दागिने, तांबे, पितळ आणि जर्मन धातूची भांडी असा एकूण दोन लाख ६६ हजार रुपयांचा माल लंपास केला. रायफूर यांनी १७ जानेवारी रोजी निजामपूर पोलिस ठाण्यात तक्रार दिल्यानंतर अज्ञात चोरट्याविरोधात गुन्हा दाखल करण्यात आला आहे.

चोरीची दुसरी घटना काल्हेर गावातील ‘रॉयल प्लाझा’ अपार्टमेंटमध्ये घडली. प्रतीक्षा संदेश म्हात्रे यांच्या बंद फ्लॅटचा कडी-कोयंडा तोडून चोरट्यांनी १८ जानेवारीच्या पहाटे ३:३० ते सकाळी ८:३० या पाच तासांच्या कालावधीत प्रवेश केला. बेडरूममधून तीन लाख ६९ हजार रुपये किमतीचे दागिने आणि रोख रक्कम चोरून नेली. याप्रकरणी नारपोली पोलिस ठाण्यात गुन्हा नोंदवण्यात आला आहे.