नारळ, सुपारी बागायतदारांसाठी कार्बनरॉड उत्तम पर्याय

नारळ, सुपारी बागायतदारांसाठी कार्बन रॉडचा पर्याय

वाणगाव, ता. १९ (बातमीदार) : नारळ व सुपारी बागायतदारांसाठी कार्बोनेक्स्ट कंपनीने कार्बन रॉड बाजारात आणले आहेत. या कार्बन रॉडच्या वापराने बागायतदारांसाठी उंच झाडांवरील नारळ, सुपारीसह झावळ्या काढण्याचे काम सोपे होणार असून, या रॉडच्या माध्यमातून झाडांवर फवारणी करणेही सोपे होणार आहे.
नुकतेच कृषी विभाग व आत्मा (पालघर) या संस्थेच्या वतीने डहाणू तालुक्यातील घोलवड व चिंचणी या दोन ठिकाणी मार्गदर्शन व प्रात्यक्षिक कार्यक्रमाचे आयोजन करण्यात आले होते. याला अनेक बागायतदार शेतकऱ्यांनी हजेरी लावली. हा कार्यक्रम अगोदर घोलवड येथे प्रभाकर सावे यांच्या नर्सरीमध्ये व नंतर चिंचणी येथील रमेश राऊत यांच्या नारळ, सुपारीच्या बागांमध्ये पार पडला. या कार्यक्रमास कार्बोनेक्स्ट कंपनीचे अभिजित खत्री, डहाणूचे तालुका कृषी अधिकारी डॉ. जगन सूर्यवंशी, कृषी विज्ञान केंद्राचे शास्त्रज्ञ उत्तम सहाणे, रूपाली देशमुख, मंडळ कृषी अधिकारी अनिल नरगूलवर, जगदीश पाटील, सचिन तोरवे तसेच उपकृषी अधिकारी किशोरी विशे व सहाय्यक कृषी अधिकारी उपस्थित होते.