डहाणू नगरपरिषदेत शाब्दिक चकमक

डहाणू नगरपरिषदेत शाब्दिक चकमक
नगराध्यक्ष, भाजप नगरसेवकांत विशेष सभेत वाद
कासा, ता.१९ (बातमीदार)ः डहाणू नगरपरिषदेची दुसरी विशेष सभा डहाणूचे सहाय्यक जिल्हाधिकारी विशाल खत्री यांच्या अध्यक्षतेखाली पार पडली. या सभेत नगरपरिषद कार्यालयाच्या संभाव्य स्थळांतराचा मुद्दा, डहाणू महोत्सवाच्या आयोजनासंबंधीचे निर्णय तसेच आयत्यावेळी चर्चेला आलेले काही ठेकेदारांशी संबंधित विषयांवरून नगराध्यक्ष राजू माच्छी व भाजप नगरसेवकांमध्ये जोरदार शाब्दिक चकमक झाली.
दोन्ही बाजूंनी आरोप-प्रत्यारोप झाल्याने सभागृहातील वातावरण तणावपूर्ण बनले. नगराध्यक्षांनी प्रशासनिक निर्णयांबाबत भूमिका मांडताना पारदर्शकतेवर भर दिला, तर भाजप नगरसेवकांनी काही निर्णयांवर आक्षेप घेत तीव्र टीका केली. त्यामुळे सुरुवातीला सुरळीत सुरू असलेली सभा उत्तरार्धात वादळी ठरली. अखेर अध्यक्षांच्या हस्तक्षेपानंतर सभा आटोपती घेण्यात आली. यावेळी स्थायी समिती, पाणीपुरवठा, सार्वजनिक बांधकाम, आरोग्य, शिक्षण आदी विविध समित्यांची स्थापना करून सभापती व उपसभापतींची निवड प्रक्रिया शांततेत पार पडली.