गटाराचे स्लॅब ढासळल्याने अपघाताची शक्यता

गटारावरील स्लॅब तुटल्याने अपघाताची शक्यता

वाडा, (बातमीदार) : वाडा शहरातील शास्त्रीनगर परिसरात नव्यानेच बांधण्यात आलेल्या गटारावरील स्लॅब तुटल्याने तेथे मोठा खड्डा पडला असून, अपघाताची शक्यता नागरिकांनी व्यक्त केली आहे. वाडा नगर पंचायत प्रशासनाने या गटाराचे बांधकाम केले आहे. या गटारांवरील काँक्रीट स्लॅब तुटल्याने लोखंडी सळ्या उघड्या पडल्या असून, तेथे मोठा खड्डा निर्माण झाला आहे. याच परिसरात नगर पंचायतीकडून उभारण्यात आलेल्या खुल्या व्यायामशाळेत दररोज मोठ्या प्रमाणात तरुणांची ये-जा असते. तसेच विद्यार्थी व महिलाही येथून प्रवास करत असतात. त्यामुळे गटारावर पडलेल्या या खड्ड्यामुळे एखाद्याला दुखापत होण्याची शक्यता स्थानिक नागरिकांनी व्यक्त केली आहे. या संदर्भात वाडा नगर पंचायतीचे मुख्याधिकारी मनोज पष्टे यांच्याशी संपर्क साधला असता त्यांच्याशी संपर्क होऊ शकला नाही.