ठाकरेंचे दाेन नगरसेवक शिवसेनेच्या संपर्कात?

ठाकरेंचे दाेन नगरसेवक
शिवसेनेच्या संपर्कात?

कल्याणमध्ये राजकीय घडामाेडींना वेग

सकाळ वृत्तसेवा
डोंबिवली, ता. १९ : कल्याण-डाेंबिवली महापालिका निवडणुकीत शिवसेना उद्धव बाळासाहेब ठाकरे पक्षातून निवडून आलेले दोन नगरसेवक शिवसेना शिंदे गटाच्या संपर्कात असल्याच्या दाव्‍यामुळे राजकीय वर्तुळात खळबळ उडाली आहे. मधुर म्हात्रे आणि कीर्ती ढोणे अशी या नगरसेवकांची नावे असून, ठाकरे गटाच्या जिल्हाप्रमुखांनी त्यांच्या घरी जाऊन नाेटीस बजावली आहे. त्यात गट स्थापनेच्या बैठकीत उपस्थित न राहिल्यास शिस्तभंगाची कारवाई करण्याचा इशारा देण्यात आला आहे.

नगरसेवक मधुर म्हात्रे यांच्या वडिलांनी, तर कीर्ती ढोणे यांच्या बहिणीने ही नोटीस स्वीकारल्याचे सूत्रांकडून सांगण्यात आले. या राजकीय घडामोडींमुळे कल्याणमधील ठाकरे गटात अस्वस्थता निर्माण झाली असून, उद्याच्या बैठकीकडे सर्वांचे लक्ष लागले आहे. बैठकीत या नगरसेवकांची भूमिका स्पष्ट होऊन पुढील राजकीय चित्र स्पष्ट होणार आहे.
महापालिकेच्या निवडणूक निकालानंतर महापौरपदाचा सत्तासंघर्ष सुरू झाला आहे.

दरम्यान, संभाव्य फुटाफूट टाळण्यासाठी ठाकरे गटाच्या नऊ, तर मनसेच्या सात नगरसेवकांना अज्ञातस्थळी ठेवण्यात आल्याचे समजते. महापाैरपदाच्या निवडीसाठी शिवसेना शिंदे गट आणि भाजपकडून आवश्यक संख्याबळासाठी प्रयत्न सुरू असून, मनसे आणि ठाकरे गटातील नगरसेवकांना आपल्या बाजूने वळवण्यासाठी पडद्यामागे हालचाली सुरू आहेत. या पार्श्वभूमीवर नगरसेवकांना सुरक्षित ठिकाणी ठेवण्यात आल्याची चर्चा आहे.