इंधन बचत ही काळाची गरज : राजू पिचिका

इंधन बचत ही काळाची गरज : राजू पिचिका
पेण, ता. २० (वार्ताहर) : राज्य महामार्गाच्या परिवहन वाहनांसह इतरही धावणाऱ्या वाहनांमधील इंधन बचत करणे ही काळाची गरज असल्याचे प्रतिपादन उद्योजक राजूशेठ पिचिका यांनी पेण एसटी आगारातील इंधन बचत मोहिमेच्या कार्यक्रमप्रसंगी केले. दिवसेंदिवस वाहनांची संख्या वाढत असल्यामुळे भविष्यात इंधनाचा तुटवडा कधीही निर्माण होऊ शकतो. हे लक्षात घेऊन वाहकांनी आपली वाहने चालवावी. इंधन बचत करणाऱ्यांना एसटी प्रशासनाच्या वतीने बक्षिसे देण्यात यावी, अशा सूचनाही पिचिका यांनी या वेळी केल्या.
महाराष्ट्र राज्य परिवहन महामंडळातर्फे दरवर्षी इंधन बचत मोहीम पंधरवडा साजरा केला जातो. या मोहिमेचा आरंभ शनिवारी (ता. १७) रायगड विभाग नियंत्रक सुहास चौरे, उद्योजक राजूशेठ पिचिका यांच्या हस्ते करण्यात आला. या वेळी एसटीचे यंत्र अभियंता संदीप शिंदे, विभाग लेखाधिकारी विशाखा ढमाले, आगार व्यवस्थापक अपर्णा वर्तक, कार्यशाळा सहाय्यक अनिल पाटील, वाहतूक निरीक्षक स्वाती मोकल आदी मान्यवरांसह चालक, वाहक, यांत्रिक तसेच कर्मचारी उपस्थित होते.