रानातल्या गणपतीच्या दर्शनासाठी भाविकांची लोटणार गर्दी

रानातल्या गणपतीच्या दर्शनासाठी गर्दी
तुर्भे, ता. २१ (बातमीदार) : तुर्भे एमआयडीसी परिसरातील गणपती पाड्यात रानातला गणपती म्हणून प्रसिद्ध असलेल्या प्राचीन स्वयंभू श्री गणेश मंदिरात माघी गणेश जयंतीनिमित्त उत्सवाची जय्यत तयारी सुरू झाली आहे. दरवर्षीप्रमाणे यंदाही भक्तिमय वातावरणात जयंती सोहळा साजरा होणार असून, दर्शनासाठी भाविकांची मोठी गर्दी अपेक्षित आहे.
या मंदिराची ओळख नवी मुंबईसह मुंबई, ठाणे, पनवेल परिसरातील गणेशभक्तांमध्ये विशेष आहे. दर संकष्टीला येथे भाविकांची गर्दी उसळते. विशेषतः माघी गणेश जयंतीच्या दिवशी मंदिर परिसरात जत्रेचे स्वरूप तयार होते. पहाटेपासूनच दर्शनासाठी रांगा लागत असून, ट्रस्टतर्फे महाप्रसादाचे आयोजन केले जाते.
श्री गणेश मंदिर चॅरिटेबल ट्रस्ट, शिरवणे यांच्या वतीने माघी गणेशोत्सव गुरुवारी (ता. २२) चिंचोली तलावाजवळील स्वयंभू श्री गणेश देवस्थान येथे साजरा होणार आहे. या सोहळ्यास मोठ्या संख्येने उपस्थित राहण्याचे आवाहन ट्रस्टचे सचिव व माजी महापौर जयवंत सुतार यांनी केले आहे.
दरम्यान, पहाटे अभिषेक व महापूजा, तर दुपारी महाप्रसादाचे आयोजन करण्यात येणार आहे. परिसर भक्तिभावाने भारावून जाणार असून तुर्भेबरोबरच कोपरी गावातही माघी गणेशोत्सव साजरा करण्यात येणार आहे.