एपीएमसीमध्ये द्राक्षांची मर्यादित आवक

जुईनगर, ता. २० (बातमीदार) : मुंबई कृषी उत्पन्न बाजार समितीमध्ये द्राक्षांच्या आवक हंगामाला सुरुवात झाली आहे. सध्या बाजारात चांगल्या दर्जाच्या सोनाका जातीच्या द्राक्षांना नऊ किलोच्या जाळीला एक हजार ते बाराशे, तर काळ्या द्राक्षांना चौदाशे ते पंधराशे रुपये भाव मिळत असून, उत्कृष्ट प्रतीच्या आणि निर्यात योग्य द्राक्षांचे भाव याहून अधिक आहेत. आवक मर्यादित असल्याने व्यापाऱ्यांमध्ये खरेदीसाठी स्पर्धा असून, त्याचा फायदा शेतकऱ्यांना होत आहे, तर ग्राहकांना किरकोळ बाजारात १५० ते २०० रुपये प्रतिकिलोने द्राक्ष खरेदी करावी लागत आहेत.

जानेवारी ते एप्रिल असा चार महिने हा हंगाम असतो, मात्र सध्या बाजारात द्राक्षांची आवक अपेक्षेपेक्षा कमी असल्याने भाव अधिक असल्याचे चित्र आहे. सध्या इंदापूर आणि तासगाव येथील शेतमाल बाजारात येत आहे. लवकरच नाशिक, सांगली आणि सोलापूर या प्रमुख द्राक्ष उत्पादक जिल्ह्यांतून मुंबई बाजारात द्राक्षांची आवक सुरू होईल, तर थंडीचा कालावधी वाढणे आणि काही भागात हवामानातील बदल यामुळे उत्पादनावर परिणाम झाला असल्याचे उत्पादकांकडून सांगितले जात आहे.

काही काळ भाव कायम राहणार
आगामी आठवड्यांत द्राक्षांची आवक वाढण्याची शक्यता असली, तरी सध्याची मागणी लक्षात घेता भाव काही काळ टिकून राहण्याचा अंदाज व्यापाऱ्यांनी व्यक्त केला आहे. लवकरच पुणे, अहमदनगर, सोलापूर, सातारा, उस्मानाबाद, बीड या जिल्ह्यांमधूनही द्राक्ष बाजारात येणार असल्याचे सांगण्यात येत आहे. ग्राहकांकडूनही द्राक्षांना चांगली मागणी असून, हंगामाच्या सुरुवातीलाच भाव तेजीत राहिल्याने बाजारात चैतन्य निर्माण झाले आहे.