मुंबई पुणे द्रुतगती मार्गावर गुरांचा कळप. प्रवाशांची सुरक्षा रामभरोसे

मुंबई-पुणे द्रुतगती मार्गावर गुरांचा कळप
खालापूर, ता. २० (बातमीदार) ः मुंबई-पुणे दुतगती मार्गावर मंगळवारी दुपारी गुरांचा कळप दिसल्याने पुन्हा एकदा या मार्गावरील सुरक्षिततेवर प्रश्नचिन्ह उभे राहिले आहे. तर भरधाव वाहनाची धडक बसून वासरूदेखील जखमी झाले. ताशी १०० किलोमीटर वेगमर्यादा असलेल्या मुंबई-पुणे द्रुतगती मार्गावर मंगळवारी किलोमीटर ३५ दरम्यान गुरांचा कळप आला. याठिकाणी अतिरिक्त लेनच काम सुरू आहे. सुसाट वाहनाची धडक बसून वासरू जखमी झाले होते. या घटनेची माहिती मिळाल्यानंतर आयआरबी पेट्रोलिंग पथकाने घटनास्थळी जाऊन मदत केली; परंतु भरमसाट टोल घेत असताना प्रवाशांची सुरक्षेकडे होत असलेले दुर्लक्ष यामुळे मंगळवारी जरी मोठी दुर्घटना टळली असली तरी याबाबत आयआरबीने गांभीर्याने विचार करावा, अशी मागणी प्रवासी करीत आहेत.