दुचाकी पार्किंगमुळे मनस्ताप

दुचाकी पार्किंगमुळे मनस्ताप
तारापूर औद्योगिक क्षेत्रात कोंडी; अपघातांचा धोका
बोईसर, ता.२१ (वार्ताहर)ः तारापूर औद्योगिक क्षेत्र येथे ट्रक टर्मिनसची व्यवस्था नसल्याने अवजड वाहने रस्त्यावर उभी राहत आहेत. त्यातच अनेक कंपन्यांकडून कामगारांच्या दुचाकी गाड्या मुख्य रस्त्याच्या कडेला उभ्या केल्या जात असल्याने कोंडीची समस्या गंभीर झाली आहे.
औद्योगिक क्षेत्रातील ७० बंगला परिसरात असलेल्या इंडिका जीन्स कंपनी (प्लॉट क्र. जी-२१) तसेच समोरील एन जी एल फाइन केम लिमिटेड (प्लॉट क्र. एस-१८/३) या कंपन्यांतील कामगारांच्या दुचाकी मोठ्या प्रमाणावर मुख्य रस्त्यालगत उभ्या केल्या जात आहेत. परिणामी या मार्गावरून ये-जा करणाऱ्या वाहनांना सतत वाहतूक कोंडीचा सामना करावा लागत आहे. विशेषतः रस्त्याच्या दोन्ही बाजूंना उभ्या असलेल्या दुचाकी वाहनांमुळे अवजड वाहने, मालवाहू ट्रक तसेच रुग्णवाहिका, अग्निशमन दलाच्या वाहनांना मार्ग काढणे कठीण झाल्याने अपघाताचा धोका वाढला आहे.
-----------------------------------
कारवाईंची मागणी
- औद्योगिक वसाहतीमधील कंपन्यांच्या आवारात स्वतंत्र पार्किंगची कोणतीही ठोस व्यवस्था केलेली नाही. औद्योगिक विकास महामंडळ वाहतूक पोलिसांकडून प्रभावी कारवाई होत नसल्याने स्थानिक नागरिकांमध्ये नाराजीचा सूर उमटत आहे.
- कंपन्यांनी तातडीने आपल्या परिसरात कामगारांसाठी योग्य पार्किंगची सोय करावी, तसेच मुख्य रस्त्यावर होणारे बेकायदेशीर पार्किंग रोखण्यासाठी प्रशासनाने कठोर पावले उचलावीत, अशी मागणी स्थानिक नागरिकांकडून केली जात आहे.
--------------------------
त्या ठिकाणी अंमलदारांना पाठवण्यात येईल. तसेच परिस्थिती बघून योग्यती कारवाई करण्यात येईल.
- संदीप नागरे, पोलिस उपनिरीक्षक