अपंग सेनेचा आंदोलनाचा इशारा

अपंग सेनेचा आंदोलनाचा इशारा
नेरूळ, ता. २१ (बातमीदार) : नवी मुंबई मनपा ईटीसी विभागांतर्गत दिव्यांगांसाठी राबविल्या जाणाऱ्या योजनांची पहिल्या टप्प्यातील आर्थिक मदत तातडीने वाटप करण्यात यावी, तसेच निवडणूक आचारसंहितेमुळे स्थगित झालेला दुसरा टप्पा पुन्हा एक महिना सुरू करून अर्ज स्वीकारण्यात यावेत, अशी मागणी अपंग सेना ऑफ नवी मुंबईतर्फे केली आहे. मागण्या मान्य न झाल्यास येत्या प्रजासत्ताकदिनी पालिका मुख्यालयासमोर शांततापूर्ण धरणे आंदोलन करण्यात येईल, असा इशारा संघटनेचे अध्यक्ष मारुती लांडे यांनी आयुक्तांना दिलेल्या निवेदनाद्वारे दिला आहे.
पालिकेच्या ईटीसी विभागाने दिव्यांगांच्या विकासासाठी विविध योजना राबवल्या असून, जून २०२५मध्ये पहिल्या टप्प्यात अर्ज स्वीकारण्यात आले होते. या लाभार्थ्यांना अद्याप रक्कम वितरित करण्यात आलेली नाही. त्यामुळे दिव्यांगांमध्ये नाराजी असून, प्रशासकीय दिरंगाईबाबत प्रश्नचिन्ह उपस्थित होत आहे. हे प्रकरण गांभीर्याने घेण्याचे व तातडीचा निर्णय घेण्याचे आवाहन संघटनेने पालिका प्रशासनाला केले आहे.