लगोरी चॅम्पियनशिपमध्ये महाराष्ट्राचा दबदबा

लगोरी स्पर्धेत महाराष्ट्राचा दबदबा

विरार, ता. २१ (बातमीदार) : चेन्नईच्या फिजिकल शैक्षणिक विद्यापीठात आयोजित ११ व्या वरिष्ठ राष्ट्रीय लगोरी स्पर्धेत गोवा, बिहार, हरियानासह १९ राज्यातील संघांनी सहभाग घेतला होता. या स्पर्धेत महाराष्ट्राच्या मुली व मुले या संघांनी तृतीय स्थान पटकावले आहे.
तृतीय स्थानासाठी झालेल्या अंतिम सामन्यात मुलींच्या संघांनी तामिळनाडूचा ३-१ असा पराभव केला. तिसऱ्या सेटमध्ये केलेल्या दमदार पुनरागमनामुळे त्यांना विजय मिळवता आला. या संघाच्या कर्णधारपदी सुहाना गाजी, तर उपकर्णधारपदी मेघा सागर यांनी कामगिरी बजावली. मुलांनी अंतिम सामन्यात झारखंडचा ३-१ असा पराभव केला. पहिला सेट गमावल्यानंतर मुलांच्या संघांनी दमदार पुनरागमन केले व सलगचे दोन्ही सेट जिंकून झारखंडला धुळ चारली. या संघाचे नेतृत्व चिराग गाजी व उपकर्णधारपदी सचिन यादव यांनी कामगिरी बजावली. या दोन्ही संघाच्या विजयानंतर त्यांच्यावर राज्यस्तरातून कौतुकांचा वर्षाव होत आहे.