हिरानंदानी लिंक रोडवरील अनधिकृत पार्किंगवर कारवाई; नागरिकांना दिलासा

हिरानंदानी लिंक रोडवरील अनधिकृत पार्किंगवर कारवाई; नागरिकांना दिलासा
घाटकोपर, ता. २२ (बातमीदार) : हिरानंदानी लिंक रोडवर सातत्याने होत असलेल्या अनधिकृत वाहन पार्किंगमुळे निर्माण होणाऱ्या वाहतूक कोंडीविरोधात शिवसेना (ठाकरे पक्ष) घाटकोपर विधानसभा समन्वयक इम्रान शेख यांच्या पुढाकाराने ठोस कारवाई करण्यात आली. या मार्गावर उभी राहणारी वाहने ये-जा करणाऱ्या वाहनांसाठी मोठा अडथळा ठरत होती. त्यामुळे दररोज वाहनचालकांना वाहतूक कोंडीचा सामना करावा लागत होता.
या रस्त्यावर मोठ्या प्रमाणात अनधिकृतपणे वाहने उभी केली जात असल्याने रुग्णवाहिका, नोकरदार तसेच शालेय विद्यार्थ्यांच्या वाहनांना वेळेवर पोहोचण्यात अडचणी येत होत्या. या पार्श्वभूमीवर करण्यात आलेल्या कारवाईमुळे रस्ता मोकळा झाला असून स्थानिक रहिवासी व प्रवाशांना मोठा दिलासा मिळाला आहे.
शिवसेना (ठाकरे पक्ष) यांच्या वतीने करण्यात आलेल्या या सक्रिय पुढाकारामुळे प्रशासनावरही आवश्यक दबाव निर्माण झाला असून, भविष्यात अशा प्रकारच्या अनधिकृत पार्किंगवर कठोर कारवाई केली जाईल, अशी अपेक्षा नागरिकांकडून व्यक्त करण्यात येत आहे.