उपकर प्राप्त इमारतीचे स्ट्रक्चरल ऑडिट होणार

उपकरप्राप्त इमारतीचे स्ट्रक्चरल ऑडिट होणार
ऑडिटरच्या नियुक्तीसाठी म्हाडाने काढली निविदा; १२,५०० इमारतींसाठी नियोजन
सकाळ वृत्तसेवा
मुंबई, ता. २५ : मुंबई शहरातील सुमारे १२ हजार ५०० उपकरप्राप्त (सेस) इमारतींचे म्हाडाकडून स्ट्रक्चरल ऑडिट केले जाणार आहे. त्यासाठी स्ट्रक्चरल ऑडिट करणाऱ्या संस्थांची नियुक्ती करण्यासाठी म्हाडाने निविदा जाहीर केल्या आहेत. त्यानुसार एका इमारतीच्या स्ट्रक्चरल ऑडिटवर सुमारे २०-८० हजार रुपये खर्च केले जाणार आहेत. त्यामुळे अतिधोकादायक इमारतींचे चित्र स्पष्ट होऊ शकणार आहे.
मुंबई शहरात सध्या आठ-दहा दशकांपूर्वी उभारलेल्या १३ हजारांहून अधिक उपकरप्राप्त इमारती आहेत. यापैकी अनेक इमारती जुन्या झाल्याने मोडकळीस आल्या आहेत. त्या पार्श्वभूमीवर पावसाळ्यात या इमारती कोसळून जीवित किंवा वित्तहानी होऊ नये यासाठी दरवर्षी पावसाळ्यापूर्वी मुंबई इमारत दुरुस्ती व पुनर्रचना मंडळाकडून सर्वेक्षण करून अतिधोकादायक इमारतींची यादी जाहीर केली जाते. त्यानुसार या अतिधोकादायक इमारतीमधील रहिवासी-भाडेकरूंचे संक्रमण शिबिरात स्थलांतर केले जाते. दरम्यान, मागील पावसाळ्याआधी म्हाडाने समारे ५०० इमारतींचे स्ट्रक्चरल ऑडिट केले होते. त्यामध्ये जवळपास ९६ इमारती अतिधोकादायक आढळल्या होत्या.
म्हाडाने आता एकाचवेळी सर्व इमारतींचे स्ट्रक्चरल ऑडिट करण्याचा निर्णय घेतला आहे. त्यासाठी संबंधित सेस इमारतींचे चार विभाग असून, त्याचे वर्षभरात स्ट्रक्चरल ऑडिट करण्यासाठी चार एजन्सीची नियुक्ती केली जाणार आहे. त्याकरिता लवकरच निविदा काढल्या आहेत. त्यामुळे वेळेत ऑडिट पूर्ण करून येणाऱ्या अहवालाच्या आधारे पुढील निर्णय घेतला जाणार असल्याची माहिती म्हाडाच्या मुंबई इमारत दुरुस्ती व पुनर्रचना मंडळातील सूत्रांनी दिली.

४० कोटी रुपयांचा खर्च
म्हाडाने १२ हजार ५०० सेस इमारतींच्या स्ट्रक्चरल ऑडिटसाठी जवळपास ४० कोटी रुपयांची तरतूद केली आहे. दरम्यान, एका इमारतीचे स्ट्रक्चरल ऑडिट करण्यासाठी २० ते ९० हजार रुपयांचा खर्च येणार आहे. इमारतीचा आकार, उंची किती आहे, त्यावर ऑडिटचा खर्च अवलंबून असणार आहे. पहिल्या टप्प्यात जास्त मोडकळीस आलेल्या इमारतींचे प्राधान्याने स्ट्रक्चरल ऑडिट केले जाणार आहे.