सरकारी नोकरी प्रलोभन पडले ७.२० लाखांना

सरकारी नोकरीचे प्रलोभन पडले ७.२० लाखांना
बनावट नियुक्तिपत्राचा पर्दाफाश; एकाविरोधात फसवणुकीचा गुन्हा दाखल
सकाळ वृत्तसेवा
ठाणे, ता. २७ : सरकारी नोकरीचे प्रलोभन दाखवत दोन बहिणींना सात लाख २० हजारांचा गंडा घातल्याची घटना ठाण्यात समोर आली आहे. या फसवणूकप्रकरणी नाशिक येथील सतीश वानखेडे (४५) याच्याविरोधात ठाणेनगर पोलिस ठाण्यात गुन्हा दाखल करण्यात आल्याची माहिती पोलिसांनी दिली.
कळवा येथील वृषाली जाधव (३८) आणि त्यांची मुंबई येथे राहणारी बहीण मृणाली माळी (४०) यांना वहिनी प्रतिभा माळी यांच्या मध्यस्थीने सतीश वानखेडे याने आपण पालघर जिल्हाधिकारी कार्यालयात क्लास वन अधिकारी असल्याचे भासवले. तसेच राज्यपाल कार्यालयातील वरिष्ठ अधिकारी राजगुरु हे आपले ओळखीचे असल्याचे सांगत, राज्यपालांमार्फत लिपिक व शिपाई पदांच्या भरतीत नोकरी देतो, असे प्रलोभन दाखवले. वानखेडे यांच्यावर विश्वास ठेवत वृषाली व मृणाली यांनी प्रत्येकी तीन लाख ६० हजार असा एकूण सात लाख २० हजार रुपये त्यांंच्या बँक खात्यात ट्रान्स्फर केले. त्यानंतर मृणाली माळी यांच्या व्हॉट्सॲपवर ठाणे उपजिल्हाधिकारी यांच्या खोट्या सही व बनावट शिक्क्यांचे मुंबई कामा रुग्णालय येथील वैद्यकीय तपासणीचे पत्र पाठविण्यात आले.
वैद्यकीय तपासणीनंतर १८ ऑक्टोबर २०२५ रोजी वृषाली व मृणाली यांच्या नावे ठाणे जिल्हाधिकारी कार्यालयातील लिपिक व टंकलेखक पदाची बनावट नियुक्तिपत्रे देण्यात आली. ही कागदपत्रे बनावट असल्याचे निष्पन्न झाल्यानंतर फसवणूक झाल्याचे लक्षात आले. त्यानंतर वृषाली यांनी पोलिस ठाण्यात धाव घेत गुन्हा दाखल केला. पुढील तपास वरिष्ठ पोलिस निरीक्षक भारत चौधरी यांच्या मार्गदर्शनाखाली सुरू आहे.