शिवडीत प्रजासत्ताक दिन उत्साहात साजरा

शिवडीत प्रजासत्ताकदिन उत्साहात साजरा
शिवडी, ता. २६ (बातमीदार) : महाराष्ट्र कामगार कल्याण मंडळाच्या कामगार कल्याण केंद्र, शिवडी येथे प्रजासत्ताकदिनानिमित्त ध्वजवंदनाचा कार्यक्रम सोमवारी (ता. २६) मोठ्या उत्साहात पार पडला. आर.सी.एफ.च्या प्रबंधक मंजिरी पुरंदरे यांच्या हस्ते ध्वजवंदन करण्यात आले. या वेळी बोलताना पुरंदरे यांनी स्वातंत्र्य, समता व बंधुता या मूल्यांवर भाष्य करत नागरिकांचे कर्तव्य काय असते, याची माहिती दिली. विशेष अतिथी अविनाश भोंडवे यांनी प्रजासत्ताकदिनाचे महत्त्व विशद करत देशभक्तीपर गीत सादर केले. कार्यक्रमाच्या प्रमुख वक्त्या प्रज्ञा साळवी यांनी आपल्या अमोघ वक्तृत्वातून भारतीय संविधानाची माहिती देत उपस्थितांची मने जिंकली. तसेच अविनाश भोंडवे यांच्या देशभक्तीपर गीतांनी आणि मिसबा शेख हिने सादर केलेल्या देशभक्तीपर शायरीने कार्यक्रमास उत्तरोत्तर रंगत आणली. कार्यक्रमातील मान्यवरांचे स्वागत केंद्र उपसंचालिका बेनझीर हवालदार यांनी केले, तर सूत्रसंचालन केंद्र संचालक भाऊ नाटळकर यांनी केले.