सलग दीड तास स्केटिंग

कल्याणच्या लेकींचा विश्वविक्रमी थरार!
सलग दीड तास स्केटिंग करून रचला इतिहास
कल्याणता. २७ (वार्ताहर) : भारतीय प्रजासत्ताकदिनाचे औचित्य साधून कल्याणमधील हॉली क्रॉस शाळेतील ५५ विद्यार्थिनींनी स्केटिंगमध्ये नवा विक्रम प्रस्थापित केला आहे. या विद्यार्थिनींनी सलग एक तास २६ मिनिटे आणि २६ सेकंद स्केटिंग करण्याचा पराक्रम करून उपस्थितांच्या डोळ्यांचे पारणे फेडले. ७७ व्या प्रजासत्ताकदिनानिमित्त आयोजित या विशेष उपक्रमात ५५ विद्यार्थिनींनी सहभाग घेतला होता. केवळ वेगच नव्हे, तर सातत्य आणि जिद्दीच्या जोरावर त्यांनी दीड तासापेक्षा जास्त वेळ स्केटिंगचा सराव यशस्वी करून दाखवला.

ऐतिहासिक क्षणी विद्यार्थिनींचे कौतुक करण्यासाठी हॉली क्रॉस शाळेच्या मुख्याध्यापिका जॅसिंथा सुआरेस, उपमुख्याध्यापिका प्रिसिला लोबो आणि भारतीय रोल बॉल संघटनेचे सचिव प्रताप पगार विशेष निमंत्रित म्हणून उपस्थित होते. मान्यवरांनी विद्यार्थिनींच्या या धाडसाचे आणि कौशल्याचे कौतुक करत त्यांना पुढील वाटचालीस शुभेच्छा दिल्या. विद्यार्थिनींना या विक्रमासाठी शाळेचे क्रीडा शिक्षक रवींद्र देसाई आणि राहुल पाटील यांनी विशेष मार्गदर्शन व प्रशिक्षण दिले. त्यांच्या मेहनतीमुळेच शाळेच्या शिरपेचात हा मानाचा तुरा रोवला गेला आहे.