मुलुंडमध्ये रंगणार ‘स्वरालयातील तुळस’ कार्यक्रम

मुलुंडमध्ये रंगणार ‘स्वरालयातील तुळस’ कार्यक्रम
मुलुंड, ता. १० (बातमीदार) ः पद्मश्री माणिक वर्मा यांच्या जन्मशताब्दी वर्षानिमित्त त्यांच्या चतुरस्त्र गायकीचे दर्शन घडवणारा ‘स्वरालयातील तुळस’ हा विशेष संगीत कार्यक्रम येत्या १५ फेब्रुवारी रोजी आयोजित करण्यात आला आहे. महाराष्ट्र सेवा संघ, मुलुंड, कऱ्हाडे ब्राम्हण संघ, मुंबई आणि मुलुंड शाखा यांच्या संयुक्त विद्यमाने रविवार, दि. १५ फेब्रुवारी रोजी सायं. ५ वाजता मुलुंड पश्चिम येथील महाराष्ट्र सेवा संघाच्या सभागृहात हा कार्यक्रम रंगणार आहे. या कार्यक्रमात केतकी भावे-जोशी, श्रुती पाध्ये-कुळकर्णी, मृणाल नाटेकर भिडे, मंजिरी भिडे, धनंजय पुराणिक, केदार भागवत, व्यंकटेश कुलकर्णी आणि दीपाली केळकर आदी कलाकार आपली कला सादर करणार आहेत. कार्यक्रमाची संकल्पना वीणा नाटेकर यांची असून, माणिक वर्मा परिवार तसेच विविध मान्यवर या वेळी उपस्थित राहणार आहेत.
कार्यक्रमास प्रवेश विनामूल्य असून, संगीतप्रेमींनी मोठ्या संख्येने उपस्थित राहावे, असे आवाहन आयोजकांनी केले आहे.