रबाले टी जंक्शन मार्गातून अवजड वाहनांची घुसखोरी

रबाळे टी जंक्शन मार्गातून अवजड वाहनांची घुसखोरी
अपघातांचा धोका वाढला
वाशी, ता. ९ (बातमीदार) : नवी मुंबई महापालिकेच्या माध्यमातून रबाळे टी जंक्शन येथे भुयारी मार्ग उभारण्यात आला असला तरी या मार्गाचा गैरवापर होत असल्याने नागरिकांच्या सुरक्षिततेचा प्रश्न निर्माण झाला आहे. भीमनगर व कातकरी पाडा येथील रहिवाशांना ऐरोली परिसरात सुरक्षितपणे जाण्यासाठी हा भुयारी मार्ग बांधण्यात आला होता. मात्र सध्या एमआयडीसीतील अवजड वाहने शॉर्टकट म्हणून या मार्गाचा वापर करीत आहेत. त्यामुळे रबाळे टी जंक्शन परिसरात वाहतूक कोंडीसह किरकोळ अपघातांची संख्या वाढली आहे.
विशेषतः झोपडपट्टी परिसरातून जाणाऱ्या या वाहनांमुळे नागरिकांमध्ये भीतीचे वातावरण असून, छत्रपती शाहू महाराज विद्यालयातील विद्यार्थ्यांना याचा मोठा त्रास सहन करावा लागत आहे. त्यामुळे मुंबई–एमआयडीसीदरम्यानची अवजड वाहने पटनी मार्गाने वळवावीत आणि भुयारी मार्गात कायमस्वरूपी वाहतूक पोलिसांची तैनाती करावी, अशी आग्रही मागणी माजी महापौर सुधाकर सोनवणे यांनी केली आहे.
कोट
रबाळे टी जंक्शन येथे भुयारी मार्ग हा रबाळे परिसरातील रहिवाशांना द्राविडी प्राणायम करीत ऐरोलीमध्ये प्रवास करावा लागत होता, त्या उद्देशाने बनवण्यात आला आहे. पण आता या भुयारी मार्गातून एमआयडीसीकडे जाणारी अवजड वाहनेदेखील जात असल्यामुळे रबाळे टी जंक्शनजवळ वाहतूककोंडीदेखील होत आहे. त्यामुळे भुयारी मार्गातून अवजड वाहनांना प्रवेश करण्यास बंदी घालावी.
सुधाकर सोनवणे, माजी महापौर, नमुंमपा