महामेळाव्यात महावितरणच्या दालनास वीज ग्राहकांचा उत्स्फूर्त प्रतिसाद

महामेळाव्यात महावितरणच्या दालनास वीज ग्राहकांचा उत्स्फूर्त प्रतिसाद
अलिबाग, ता. १६ ( वार्ताहर ) : अलिबाग येथे आयोजित जिल्हा विधी सेवा महाशिबिर व विविध शासकीय योजनांच्या महामेळाव्यात महावितरणच्या पेण मंडळाने उभारलेल्या माहिती दालनाला वीज ग्राहकांचा उत्स्फूर्त प्रतिसाद लाभला. जिल्हाधिकारी किशन जावळे, प्रमुख जिल्हा व सत्र न्यायाधीश राजेंद्र सावंत, मुख्य कार्यकारी अधिकारी नेहा भोसले तसेच जिल्हा विधी सेवा प्राधिकरणाच्या सचिव तेजस्विनी निराळे यांनी दालनाला भेट देऊन योजनांची सविस्तर माहिती घेतली.
महावितरणतर्फे पंतप्रधान सूर्यघर मुफ्त वीज योजना, ‘मागेल त्याला सौर कृषी पंप’ योजना तसेच टीओडी मीटरचे फायदे याबाबत नागरिकांना मार्गदर्शन करण्यात आले. या योजनांचा लाभ घेतलेल्या सुप्रिया पाटील व प्रवीण पाटील यांना प्रमाणपत्र देऊन गौरविण्यात आले. सुमारे २५० नागरिकांनी दालनाला भेट देत वीज बचत व सौरऊर्जेच्या योजनांबाबत माहिती घेतली.
यावेळी पेण मंडळाचे अधीक्षक अभियंता धनराज बिक्कड, कार्यकारी अभियंता उमेश चव्हाण, अतिरिक्त कार्यकारी अभियंता आकाश तायडे, सहाय्यक अभियंता महेश पाटील यांच्यासह महावितरणचे कर्मचारी उपस्थित होते.