महाविद्यालयात शिवजन्मोत्सव सोहळा

महाविद्यालयात शिवजन्मोत्सव सोहळा
विरार (बातमीदार) : रयत शिक्षण संस्थेचे कर्मवीर भाऊराव पाटील विद्यालय व एस. पी. कनिष्ठ महाविद्याल जूचंद्र येथे गुरुवारी (ता. १९) शिवजन्मोत्सव सोहळा उत्साहात पार पडला. या सोहळ्याचे औचित्य साधून इयत्ता नववी अ च्या विद्यार्थ्यांनी आपल्या कल्पकतेचे दर्शन घडवत, वर्गशिक्षिका मयूरी गावडे यांच्या मार्गदर्शनाखाली फुलांच्या सुंदर माळा तयार करून विद्यालयाची सजावट केली होती. भगव्या ध्वजांच्या डौलाने आणि ‘जय भवानी, जय शिवाजी’च्या जयघोषाने अवघा परिसर शिवमय झाला होता. कार्यक्रमाची सुरुवात मान्यवरांच्या हस्ते शिवस्मारकाच्या पूजनाने झाली. या वेळी रयत शिक्षण संस्थेचे सदस्य विनय पाटील, स्थानिक सल्लागार समितीचे उपाध्यक्ष विवेकानंद पाटील, वरिष्ठ पोलिस अधिकारी आवारी, माजी विद्यार्थी संघटनेचे डॉ. पुरुषोत्तम म्हात्रे, नावडे कॉलेजचे प्राध्यापक निमसे यांची प्रमुख उपस्थिती लाभली.