साईसागर रेस्टॉरंटवर चोरट्यांचा डल्ला

​अंबरनाथ, ता. २१ (वार्ताहर) : शहरातील लादीनाका परिसरातील साईसागर रेस्टॉरंट आणि परमिट रूम बारमध्ये चोरट्याने डल्ला मारल्याची घटना समोर आली आहे. याप्रकरणी हॉटेल व्यावसायिक राजस पिसाळ यांनी अंबरनाथ पोलिस ठाण्यात तक्रार दाखल केली असून, पोलिसांनी चोरट्याविरुद्ध गुन्हा नोंदवला आहे.
​ही घटना १९ फेब्रुवारीला रात्री १२.३० ते २० फेब्रुवारी सकाळी १० च्या दरम्यान घडली. चोरट्याने हॉटेलच्या मागील बाजूला असलेल्या किचनच्या दरवाजातून प्रवेश केला. त्यानंतर बारमधील लाकडी काउंटरच्या ड्रॉव्हरचे लॉक तोडून त्यातील ६० हजार रुपयांची रोकड आणि एक मोबाईल असा एकूण ६१ हजार रुपये किमतीचा मुद्देमाल चोरून नेला. याप्रकरणी अंबरनाथ पोलिसांनी गुन्हा नोंद केला आहे. अंबरनाथ पोलिस या घटनेचा अधिक तपास करत आहेत.