महिलेचा जंतू संसर्गामुळे मृत्यू

कासामधील महिलेचा जंतूसंसर्गामुळे मृत्यू

कासा, ता. २१ (बातमीदार) : कासा बुद्रुक येथील मीना महेंद्र राऊत (वय ३१) यांचा जंतूसंसर्गामुळे उपचारादरम्यान मृत्यू झाला आहे. गुरुवारी (ता. १९) संध्याकाळी ही घटना घडली आहे.
मीना राऊत या नदीवर कपडे धुण्यासाठी गेल्या असताना त्यांना अचानक उलटीचा तीव्र त्रास सुरू झाला. ही माहिती कळताच पती महेंद्र राऊत यांनी त्यांना तातडीने घरी आणून प्राथमिक आरोग्य केंद्र, तलवाडा येथे उपचारासाठी दाखल केले. तेथील डॉक्टरांनी उपचार करण्याचा प्रयत्न केला; मात्र उलट्यांमुळे त्यांची प्रकृती खालावली होती. रक्तातील साखरेचे प्रमाण वाढले होते. तसेच जंतूसंसर्ग झाल्याचे निदर्शनास आले. सुमारे एक तास उपचार केल्यानंतर पुढील उपचारांसाठी त्यांना सायंकाळी ६.३०च्या सुमारास कासा उपजिल्हा रुग्णालय पाठविण्यात आले. सायंकाळी ६.४८ वाजता अत्यवस्थ अवस्थेत रुग्णालयात दाखल झाल्यानंतर डॉक्टरांनी उपचार सुरू केले; मात्र सायंकाळी ७.५५ वाजता त्यांना मृत घोषित करण्यात आले. कासा उपजिल्हा रुग्णालयातील डॉक्टरांनी सांगितले, की दाखल करताना त्यांची अवस्था अत्यंत गंभीर होती. मृत महिलेचे पती महेंद्र राऊत यांनी सांगितले, की गेल्या काही दिवसांपासून त्यांना असा त्रास जाणवत होता; मात्र गुरुवारी उलट्यांचे प्रमाण अधिक वाढले. मीना राऊत यांची दुसरी प्रसूती अवघ्या २० दिवसांपूर्वीच झाली होती. त्यांच्या पश्चात दोन लहान मुले असून त्यांचे पती हे शेतकरी आहेत.