गांधारी रिंगरोडवरील भरधाव वाहनांवर कारवाई करण्याची शिवसेनेची मागणी

रिंगरोडवर भरधाव वाहनांचा धोका
कारवाईसाठी शिवसेनेची मागणी; वाहतूक पोलिसांकडून तपासणी मोहीम सुरू
कल्याण, ता. २४ (वार्ताहर) : कल्याण पश्चिमेतील गांधारी वडवली रिंगरोड येथे वाहनचालक अतिवेगाने वाहने चालवत असल्याने वारंवार अपघाताच्या घटना घडतात. या अपघातांना कारणीभूत असलेल्या भरधाव वाहनांवर कारवाई करण्याची मागणी शिवसेना विभाग उपप्रमुख कुणाल कुलकर्णी यांनी वाहतूक विभागाच्या सहाय्यक पोलिस आयुक्तांना पत्र दिले आहे.
गांधारी वडवली रिंगरोड हा रस्ता पूर्णत्वास आलेला नाही. तरी या रस्त्यावर दिवसा व रात्रीच्या वेळी भरधाव दुचाकीस्वार व वाहनचालक रेसिंग लावून इतर नागरिकांचा जीव धोक्यात घालत आहेत. नुकताच काही दिवसांपूर्वी याठिकाणी अपघात होऊन एक जण गंभीर जखमी झाला होता. भरधाव वाहनांच्या वेगामुळे मोठा अनर्थ होण्याची शक्यता आहे. त्यामुळे याठिकाणी स्पीडगन, दुभाजक, गतिरोधक लावून ठोस कारवाई करण्याची मागणी कुणाल कुलकर्णी यांनी केली आहे. दरम्यान, कुलकर्णी यांच्या पत्रानंतर वाहतूक पोलिस सतर्क झाले असून रिंगरोडवर बंदोबस्त लावून वाहनचालकांची तपासणी करत कारवाई केली आहे.