समता विद्या मंदिर शाळेचे यश

शिष्यवृत्तीत समता विद्यामंदिर शाळेचे यश

घाटकोपर, ता. २५ (बातमीदार) : इयत्ता आठवीसाठी घेण्यात आलेल्या राष्ट्रीय आर्थिक दुर्बल घटक विद्यार्थ्यांसाठीच्या शिष्यवृत्ती योजनेअंतर्गत राष्ट्रीय साधन-सह-गुणवत्ता शिष्यवृत्ती योजना (एन.एम.एम.एस.) परीक्षा २०२५-२६ चा निकाल जाहीर झाला आहे. यामध्ये साकीनाका येथील समता विद्यामंदिर शाळेने उल्लेखनीय यश संपादन करत आपली गुणवत्ता पुन्हा एकदा सिद्ध केली आहे.
या परीक्षेसाठी शाळेतील इयत्ता आठवीचे एकूण पाच विद्यार्थी प्रविष्ट झाले होते. त्यापैकी तब्बल चार विद्यार्थी उत्तीर्ण झाले असून, शाळेचा निकाल ८० टक्के लागला आहे. हा निकाल शाळेसाठी अत्यंत अभिमानास्पद मानला जात आहे. या परीक्षेत श्रावणी गणेश संकपाळ, जयेश दीपक कुचेकर , कुणाल अजय शिंदे आणि स्वप्निल अशोक छापछडे यांनी यश संपादन केले आहे. या यशामागे शाळेच्या मुख्याध्यापिका भारती पोवळे यांचे परिश्रमपूर्वक मार्गदर्शन, विद्यार्थ्यांची सातत्यपूर्ण मेहनत आणि पालकांचे सहकार्य महत्त्वाचे ठरले आहे. तसेच समता शिक्षण संस्थेचे सचिव राजेश सुभेदार यांचे सततचे मार्गदर्शन व प्रेरणा यामुळे हे यश शक्य झाले, अशी भावना शाळा प्रशासनाच्या वतीने व्यक्त करण्यात आली आहे.