घनकचरा, मलजल व्यवस्थापनाचे धडे

घनकचरा, मलजल व्यवस्थापनाचे धडे
विरार, ता. २६ (बातमीदार) ः वसई-विरार पालिका, युनिट्रॅक मीडिया तसेच वसई तालुका हाउसिंग फेडरेशन यांच्या संयुक्त विद्यमाने ‘घनकचऱ्याचे व्यवस्थापन व मलजल व्यवस्थापन आणि पुनर्विकास’ या विषयावर मोफत शिबिर, प्रदर्शन होणार आहे. वसई-विरार पालिकेच्या मुख्य कार्यालय, दुसरा मजला, यशवंतनगर, विरार (पश्चिम) येथे शनिवारी, रविवार सकाळी ११ ते रात्री ८ या वेळेत हे शिबिर होणार आहे.
शहराच्या स्वच्छतेच्या दृष्टीने प्रदर्शनात आवश्यक उपाययोजनांबाबत मार्गदर्शन केले जाणार आहे. तसेच ‘सांडपाणी प्रक्रिया’ या विषयावर नवीन तांत्रिक उपकरणे, साधने यांचे प्रदर्शन केले जाणार आहे. ओला-सुका कचरा, संगणकीय कचरा असे कचऱ्याचे वर्गीकरण स्वत:च्या घरापासून कसे करावे, प्लॅस्टिकचा वापर कमी करण्यासाठी कोणत्या उपाययोजना कराव्यात, घरात दररोज निर्माण होणाऱ्या जैविक कचऱ्याचे खतामध्ये कसे रूपांतर करावे, तसेच ‘स्वच्छतेबाबत नागरिकांची जबाबदारी’बाबत सविस्तर माहिती देण्यात येणार आहे.