मॅनहोलवरील लोखंडी झाकण गायब; दुर्घटनेची भीती

मॅनहोलवरील लोखंडी झाकण गायब; दुर्घटनेची भीती
चेंबूर, ता. २६ (बातमीदार) : गोवंडी येथील देवनार पालिका वसाहत, इमारत क्रमांक १७ जवळील रस्त्यावर असलेल्या मॅनहोलवरील लोखंडी झाकण चोरीला गेल्याने परिसरात धोकादायक परिस्थिती निर्माण झाली आहे. उघड्या मॅनहोलमुळे रहिवाशांना या मार्गावरून ये-जा करताना जीव मुठीत धरून चालावे लागत आहे.
मुंबईत गेल्या काही महिन्यांपासून मॅनहोलची शेकडो झाकणे चोरीला गेल्याच्या घटना घडल्या असून, त्यातून अपघात होऊन सामान्य नागरिकांचे बळीही गेले आहेत. अशाच प्रकारची परिस्थिती देवनार पालिका वसाहतीत निर्माण झाली आहे. स्थानिकांच्या म्हणण्यानुसार, संबंधित मॅनहोलवरील झाकण अनेक दिवसांपासून गायब आहे. त्यामुळे एखादी गंभीर दुर्घटना घडण्याची दाट शक्यता व्यक्त केली जात आहे. याबाबत पालिका प्रशासनाला कळविण्यात आले असूनही अद्याप झाकण बसविण्यात आलेले नाही. परिणामी वाहनचालक आणि पादचारी दोघांनाही मोठ्या त्रासाला सामोरे जावे लागत आहे.
उघड्या मॅनहोलवर तातडीने नवीन झाकण बसवून नागरिकांची सुरक्षितता सुनिश्चित करावी, अशी मागणी स्थानिक रहिवाशांनी केली आहे.