रोह्यात छ. शिवाजी महाराज महाराजस्व समाधान शिबिराचे आयोजन

रोह्यात महाराजस्व समाधान शिबिर
रोहा (बातमीदार) ः तालुक्यात सर्व महसूल मंडळ विभागात आठ दिवस छत्रपती शिवाजी महाराज महाराजस्व समाधान शिबिर अभियान आयोजित करण्यात आले आहे. नियोजित दिवशी विद्यार्थी व पालकांनी उपस्थित राहून या शिबिराचा लाभ घ्यावा, असे आवाहन रोहा तहसीलदार किशोर देशमुख यांनी केले आहे. या नियोजित शिबिरात चालू शैक्षणिक वर्षात विद्यार्थ्यांना विशेषकरून दहावी व बारावीच्या विद्यार्थ्यांना पुढील शैक्षणिक वर्षात प्रवेश मिळवण्यासाठी लागणारे जातीचे दाखले, रहिवासी दाखले, वय व अधिवास दाखले, उत्पन्नाचे दाखले, आधार कार्ड असे आवश्यक विविध प्रकारचे दाखले प्रवेशापूर्वीच केंद्रप्रमुख व तालुका शिक्षणाधिकारी यांची सभा घेऊन ग्राम महसूल अधिकारी (तलाठी) व ग्राम पंचायत अधिकारी (ग्रामसेवक) यांच्याकडून आवश्यक पुरावे गोळा करून महसूल मंडळातील शिबिरात विद्यार्थीवर्गाला दाखले वाटप करण्यात येणार आहेत. सर्व केंद्रात हे शिबिर सकाळी ११ वाजता सुरू होणार असून, कोलाड ७ मार्च, नागोठणे १४ मार्च, चणेरा १० एप्रिल, घोसाळे १७ एप्रिल, निडीतर्फे अष्टमी १ मे तर रोहा नगरपालिका हद्दीतकरिता ८ व १५ मे रोजी होणार आहे. या शिबिराचे पालक व विद्यार्थीवर्गाने लाभ घ्यावा, असे आवाहन तहसीलदार किशोर देशमुख यांनी केले आहे.