दिवाळे कोळीवाड्यात पारंपरिक लंगोटी क्रिकेट स्पर्धा

दिवाळे कोळीवाड्यात पारंपरिक लंगोटी क्रिकेट स्पर्धा
तुर्भे, ता. ३ (बातमीदार) : नवी मुंबईतील दिवाळे कोळीवाडा येथे होळी उत्सवानिमित्त पारंपरिक ओव्हरआर्म लंगोटी क्रिकेट स्पर्धा उत्साहात पार पडली. आधुनिकतेच्या काळातही परंपरेचे जतन करत आयोजित करण्यात आलेल्या या स्पर्धेला परिसरातील नागरिकांनी मोठी उपस्थिती लावली. गावच्या मातीत रंगलेल्या या स्पर्धेत तब्बल १३ संघ सहभागी झाले होते.
सर्व खेळाडूंनी डोक्यावर लाल टोपी आणि कमरेला सुरका परिधान करून पारंपरिक कोळी वेशभूषेत सामने खेळले. त्यामुळे संपूर्ण स्पर्धेला वेगळीच रंगत प्राप्त झाली. प्रसिद्ध पंचांच्या उपस्थितीत सामने शिस्तबद्ध वातावरणात पार पडले. मे. अक्षय डेव्हलपर्सचे सोमनाथ देवकर यांच्या पुढाकारातून आयोजित करण्यात आलेली ही स्पर्धा यंदा १८ व्या वर्षात पदार्पण करत आहे.
ही स्पर्धा केवळ क्रीडा उपक्रम नसून आगरी-कोळी समाजाच्या सांस्कृतिक जतनाची ओळख ठरली. नवतरुणांनी मैदानी खेळांची परंपरा जपावी आणि मोठ्या पातळीवर झेप घ्यावी, असा संदेश आयोजक सोमनाथ देवकर यांनी दिला.