पनवेलमध्ये पाण्याच्या टँकरच्या धडकेत 38 वर्षीय पादचाऱयाचा मृत्यू

टँकरच्या धडकेत
पादचाऱ्याचा मृत्यू
पनवेल, ता. ७ (वार्ताहर) : उसर्ली गाव परिसरात रस्त्यावरून जाणाऱ्या ३८ वर्षीय व्यक्तीला समोरून येणाऱ्या भरधाव पाण्याच्या टँकरने धडक दिली. यामुळे झालेल्या अपघातात संबंधित व्यक्तीचा मृत्यू झाल्याची दुर्घटना शुक्रवारी (ता. ६) सकाळी १०च्या सुमारास घडली. पोलिसांनी टँकरचालकाविरोधात गुन्हा दाखल करून त्याला ताब्यात घेतले आहे.
अपघातात मृत्यू झालेल्या व्यक्तीचे नाव मनोज रामजी कांबळे (३८) असे असून, उसर्ली गाव येथील घरकुल सोसायटीत तो राहत होता. मनोज हा नेहमीप्रमाणे आपल्या घरातून कामावर जाण्यासाठी पायी निघाला असताना इच्छापूर्ती इमारतीजवळ समोरून येणाऱ्या भरधाव पाण्याच्या टँकरने मनोज याला धडक दिली. या अपघातात मनोज गंभीर जखमी झाला. त्याला रुग्णालयात दाखल करण्यात आले, पण त्याचा मृत्यू झाल्याचे डॉक्टरांनी घोषित केले.