फुंडे विद्यालयात स्त्री सशक्तीकरणाचा उत्सव

फुंडे विद्यालयात स्त्री सशक्तीकरणाचा उत्सव
आंतरराष्ट्रीय महिला दिनानिमित्त शिक्षिका, विद्यार्थिनींचा सन्मान
उरण, ता. १० (बातमीदार) : रयत शिक्षण संस्था संचालित तुकाराम हरी वाजेकर उच्च माध्यमिक विद्यालय, फुंडे येथे ११६वा आंतरराष्ट्रीय महिला दिन विविध उपक्रमांनी साजरा करण्यात आला. विद्यालयाचे प्राचार्य महाराष्ट्र राज्य आदर्श शिक्षक पुरस्कार विजेते बी. बी. साळुंखे यांच्या मार्गदर्शनाखाली हा कार्यक्रम झाला.
या वेळी चेअरमन कृष्णाजी कडू, उपमुख्याध्यापिका एस. डी. थोरात, पर्यवेक्षिका एस. एम. बाबर, एस. एस. पाटील, प्रमुख वक्ते एस. डी. म्हात्रे, वरिष्ठ लिपिक नितीन म्हात्रे, नवनीत ठाकूर आदी उपस्थित होते. कार्यक्रमाच्या प्रारंभी त्यागमूर्ती लक्ष्मीबाई पाटील व क्रांतिज्योती सावित्रीबाई फुले यांच्या प्रतिमांचे पूजन करण्यात आले.
कार्यक्रमात विद्यालयातील सर्व शिक्षिका आणि भगिनींचा पुष्प व भेटवस्तू देऊन सन्मान करण्यात आला. विद्यार्थिनी श्रेया शिंदे, आर्या शिर्के, कांचन घुगे आणि श्रवण गोरे यांनी थोर महिलांच्या कार्याची माहिती सांगितली. तसेच विद्यार्थिनी सुहानी प्रजापती हिने गीत सादर केले.
चौकट :
स्त्री-पुरुष समानतेचा संदेश
कार्यक्रमात बोलताना शिक्षकांनी महिलांनी शिक्षण, क्रीडा, विज्ञान व राजकारण अशा विविध क्षेत्रांत उल्लेखनीय कामगिरी करून समाजाला दिशा दिल्याचे सांगितले. महिला दिन केवळ ८ मार्चपुरता मर्यादित न ठेवता वर्षभर स्त्रीच्या कर्तृत्वाचा सन्मान व्हावा आणि समाजात स्त्री-पुरुष समानतेची भावना रुजावी, असे आवाहन करण्यात आले.