नढई-नारिवली रस्त्यासाठी ११ कोटींचा निधी मंजूर

मुरबाड, ता. १२ (बातमीदार) : तालुक्यातील नढई ते नारिवली या महत्त्वाच्या रस्त्याच्या कामासाठी आमदार किसन कथोरे यांच्या प्रयत्नातून ११ कोटी रुपयांचा निधी मंजूर करण्यात आल्याची माहिती मुरबाड कृषी उत्पन्न बाजार समितीचे संचालक सुरेश बांगर यांनी दिली. या निधीतून संबंधित रस्त्याचे साडेपाच मीटरपर्यंत रुंदीकरण करण्यात येणार असून, संपूर्ण रस्ता सिमेंट काँक्रीट होणार असल्याचेही त्यांनी सांगितले. नढई-नारिवली या मार्गावरून मोठ्या प्रमाणात खडी वाहून नेणारे डम्पर वाहतूक करत असल्याने रस्त्यावर वारंवार खड्डे पडत होते. तसेच रस्ता अरुंद असल्यामुळे वाहनचालकांना मोठ्या अडचणींचा सामना करावा लागत होता. रस्त्याचे रुंदीकरण व काँक्रीटीकरण झाल्यानंतर या मार्गावरील वाहतूक अधिक सुरळीत आणि वेगवान होण्यास मदत होणार आहे. स्थानिक नागरिकांसह वाहनचालकांना मोठा दिलासा मिळणार असल्याचे सुरेश बांगर यांनी सांगितले.