दागिने चोरीच्या उद्देशाने महिलेला ठार मारण्याचा प्रयत्न

भिवंडी, ता. १५ (वार्ताहर) : घरात ५८ वर्षीय महिला एकटी असल्याची संधी साधून त्याच गावातील ३५ वर्षीय महिलेने दागिने चोरीच्या उद्देशाने घरात शिरली. त्या महिलेला मारहाण केली. तिला रक्तबंबाळ करीत तिचा गळा आवळून ठार मारण्याचा प्रयत्न केल्याची घटना लोनाड येथील देवरूंग पाड्यातून समोर आली आहे. याप्रकरणी प्रमिला कैलास गोडे (वय ३५) हिच्याविरोधात पडघा पोलिस ठाण्यात अदखलपात्र गुन्हा दाखल केला आहे. हा दखलपात्र गुन्हा असताना पोलिसांनी फक्त अदखलपात्र गुन्हा नोंदवल्याने तक्रारदार पार्वती तुकाराम गोडे यांनी महिला आयोगाच्या अध्यक्षांना पत्र लिहिले आहे.