गावरान कैरीसह पन्ह्याची मागणी वाढली

उन्हाच्या तडाख्यासोबत पन्ह्याला मागणी
गॅस दरवाढ आणि तुटवड्यामुळे पन्हे पाच रुपयांनी महाग

ठाणे, ता. १६ (बातमीदार): उन्हाची तीव्रता वाढू लागल्याने बाजारपेठेत गावरान कैऱ्यांचे आगमन झाले आहे. थंड पेयांना पर्याय म्हणून नागरिक पारंपरिक ‘कैरीच्या पन्ह्याला’ पसंती देत आहेत. मात्र, गेल्या वर्षीच्या तुलनेत यंदा कैरी आणि पन्हे या दोन्हीच्या दरात वाढ झाली आहे. गॅस सिलिंडरची दरवाढ आणि युद्धजन्य परिस्थितीमुळे निर्माण झालेली टंचाई याचा थेट फटका या व्यवसायाला बसला असल्याचे विक्रेत्यांनी सांगितले.

गेल्या उन्हाळ्यात १५ रुपयांना मिळणारा पन्ह्याचा एक ग्लास आता २० रुपयांवर पोहोचला आहे. लिटरचा दरही १२५ रुपयांवरून १३० रुपयांवर गेला आहे. केवळ पन्हेच नाही, तर कच्च्या कैऱ्याही महागल्या आहेत. छोट्या कैऱ्यांचा वाटा २० रुपयांवरून २५ रुपयांवर पोहोचला आहे, तर मोठ्या कैऱ्यांचा वाटा ३० रुपयांवरून ५० रुपये झाला आहे. इतर कोणत्याही महागड्या कोल्ड्रिंकपेक्षा उन्हाळ्यात शरीराला हायड्रेटेड ठेवण्यासाठी कैरीचे पन्हे हा सर्वोत्तम पर्याय मानला जातो. सध्या गॅस सिलिंडर महागले आहेत, शिवाय अनेकदा पुरवठा वेळेवर होत नाही. यामुळे खर्चात वाढ झाल्याने आम्हाला पन्ह्याचे दर पाच रुपयांनी वाढवावे लागले आहेत. अशी प्रतिक्रिया पन्हे विक्रेते रामचंद्र गोडबोले यांनी दिली.

आदिवासीबांधवांना रोजगार
उन्हाळा सुरू झाला की कैरीपासून पन्हे, लोणचे, आमसूल, कैरी साठ आणि आंबा पोळी बनवण्यासाठी गृहिणींची लगबग सुरू होते. जंगलातील गावरान कैऱ्या तोडून विक्रीसाठी आणणाऱ्या आदिवासी महिलांना या हंगामात चांगला रोजगार उपलब्ध होतो. महागाई असूनही आरोग्यासाठी गुणकारी असलेल्या या गावरान कैऱ्यांच्या खरेदीसाठी नागरिक बाजारपेठेत गर्दी करत आहेत.