डम्परच्या धडकेत डिलिव्हरी बॉयचा मृ्त्यू

डम्परच्या धडकेत
डिलिव्हरी बॉयचा मृ्त्यू
मुंबई, ता. १६ ः भरधाव डम्परने दिलेल्या धडकेत एका २८ वर्षीय डिलिव्हरी बॉयचा अपघाती मृत्यू झाला. ही घटना दहिसर येथे पश्चिम द्रुतगती महामार्गावर सोमवारी दुपारी घडल्याचे पोलिस अधिकाऱ्यांनी सांगितले. समीर शेख असे मृत डिलिव्हरी बॉयचे नाव असून, तो अंधेरीच्या जुहू गल्ली परिसरात वास्तव्यास होता. दहिसर चेक नाका परिसरात पश्चिम द्रुतगती महामार्गावरून जाताना समीरच्या दुचाकीला भरधाव डम्परने पाठीमागून जोरदार धडक दिली. त्यात समीरचा मृत्यू झाला. घटनेनंतर डम्परचालक अकबर पठाण (वय ४३) हा घटनास्थळावरून पसार झाला. मात्र, पाठलाग करून त्यास अटक केल्याचे दहिसर पोलिस ठाण्यातील अधिकाऱ्यांनी सांगितले.