आधारवाडी कारागृहाबाहेर आतषबाजी; तिघे अटकेत

आधारवाडी कारागृहाबाहेर आतषबाजी; तिघे अटकेत

डोंबिवली, ता. १७ : कल्याण पश्चिमेतील आधारवाडी कारागृहाबाहेर उच्च दाब विद्युत कुंपणाजवळ फटाक्यांची आतषबाजी करीत कैद्याचा वाढदिवस साजरा करणाऱ्या तिघा तरुणांना खडकपाडा पोलिसांनी अटक केली आहे.

पोलिसांच्या माहितीनुसार, सतीश मार्तंड कांबळे ऊर्फ सत्या हा विविध गुन्ह्यांप्रकरणी कारागृहात न्यायबंद आहे. त्याच्या वाढदिवसानिमित्त समर्थकांनी ‘हॅप्पी बर्थडे’च्या घोषणांसह ४४० व्होल्ट उच्चदाब कुंपणाखाली फटाके उडवले. या प्रकाराचा व्हिडिओही समाजमाध्यमांवर व्हायरल झाला.

कारागृह कर्मचाऱ्यांनी हस्तक्षेप करण्याचा प्रयत्न केला असता संबंधितांनी धक्काबुक्की करून पळ काढला. सीसीटीव्हीच्या आधारे रोहित जगदाळे, क्षितिज भगत आणि आकाश खडसे यांना अटक करण्यात आली असून, त्यांना न्यायालयाने पोलिस कोठडी सुनावली आहे.