कामगारांची सुरक्षा वाऱ्यावर

कामगारांची सुरक्षा वाऱ्यावर
तारापूर एमआयडीसीमध्ये यंत्रणांचा अभाव
बोईसर, ता. १८ (वार्ताहर) : तारापूर औद्योगिक वसाहतीत दुर्घटना घडल्यास कोणतीही पूर्वसूचना मिळत नसल्यामुळे परिस्थिती अधिक गंभीर होत असल्याचे वांरवांर दिसून आले आहे. अनेक कारखान्यांनी मूलभूत सुरक्षा उपायांकडे दुर्लक्ष केल्याने असे प्रकार वांरवार घडत आहेत.
तारापूर औद्योगिक क्षेत्रातील अनेक कारखान्यांमध्ये धोक्याची घंटा (अलार्म) देणारी यंत्रणा नसल्याचे गंभीर वास्तव समोर आले असून, अलीकडील दुर्घटनांदरम्यान अलार्मच्या अभावामुळे कामगारांमध्ये मोठी धावाधाव व गोंधळ उडाल्याची बाब पुढे आली आहे. परिणामी, आपत्कालीन परिस्थितीत वेळेत इशारा न मिळाल्याने अनेकांच्या जीवाला धोका निर्माण झाला. तज्ज्ञांच्या मते, प्रभावी अलार्म प्रणाली औद्योगिक सुरक्षेची पहिली गरज असून, तिच्या अभावामुळे छोट्या दुर्घटनाही मोठ्या आपत्तीमध्ये रूपांतरित होण्याचा धोका असतो. तसेच माहितीफलक नसल्याने अग्निशमन दलालाही योग्य माहिती मिळण्यात अडचणी येतात. त्यामुळे औद्योगिक सुरक्षेच्या नियमांच्या उल्लंघनाकडे प्रशासनाने गांभीर्याने लक्ष देण्याची मागणी होत आहे.