पंडीत दीनदयाल उपाध्याय रोजगार मेळावा

रोजगार मेळाव्याला तरुणांचा प्रतिसाद

पालघर, ता. २१ (बातमीदार) : जिल्हा कौशल्य विकास, रोजगार व उद्योजकता मार्गदर्शन केंद्र, पालघर, मॉडेल करिअर सेंटर यांच्या संयुक्त विद्यमाने रोजगार मेळाव्याचे आयोजन करण्यात आले होते. हा मेळावा पागधरे इन्स्टिट्यूट, दुसरा मजला, मच्छीमार सोसायटी, माहीम रोड, पालघर येथे झाला. या वेळी असंख्य तरुणांनी रोजगार मेळाव्याला उपस्थिती दर्शवली होती. या मेळाव्याला १०३ उमेदवारांनी सहभाग नोंदवला, ज्यातील ३४ उमेदवारांची प्राथमिक निवड करण्यात आली आहे. तसेच उर्वरित रिक्त पदांसाठी अद्याप भरती प्रक्रिया सुरू असून इच्छुक उमेदवारांनी जिल्हा कौशल्य विकास, रोजगार व उद्योजकता मार्गदर्शन केंद्र, पालघर यांच्याशी संपर्क साधण्याचे आवाहन सहाय्यक आयुक्त रेणुका तम्मलवार यांनी केले आहे. या कार्यक्रमाच्या यशस्वी आयोजनासाठी पागधरे इन्स्टिट्यूट संस्थेचे अधिकारी/कर्मचारी तसेच जिल्हा कार्यालयाचे कर्मचारी यांनी परिश्रम घेतले. या उपक्रमामुळे जिल्ह्यातील तरुणांना रोजगाराच्या उत्तम संधी उपलब्ध झाल्याचे समाधान आयोजकांनी व्यक्त केले आहे.