घाटकोपरमध्ये टँकरच्या धडकेत तरुणीचा मृत्यू

घाटकोपरमध्ये टँकरच्या धडकेत तरुणीचा मृत्यू
घाटकोपर, ता. २८ (बातमीदार) : घाटकोपर पूर्व येथील सिंधूवाडी जंक्शन परिसरात झालेल्या भीषण अपघातात एका तरुणीचा जागीच मृत्यू झाल्याची दुर्दैवी घटना घडली. यामिनी सुवारे (२८, रा. पंतनगर) असे मृत तरुणीचे नाव आहे.
मिळालेल्या माहितीनुसार, सिग्नलवर टँकर उभा असताना यामिनी सुवारे रस्ता ओलांडत होती. या वेळी रस्ता पूर्णपणे पार करण्याआधीच भरधाव टँकरचालकाने अचानक टँकर पुढे नेला. त्यामुळे ती टँकरच्या चाकाखाली आल्याने तिचा जागीच मृत्यू झाला. या दुर्घटनेनंतर स्थानिक नागरिकांनी तत्काळ पोलिसांना माहिती दिली. पोलिसांनी घटनास्थळी धाव घेत टँकरचालकाला ताब्यात घेऊन अटक केली. याप्रकरणी पुढील तपास सुरू असून, या दुर्घटनेमुळे परिसरात हळहळ व्यक्त होत आहे.