आदिवासी साहित्य संमेलनाचे आयोजन

आदिवासी साहित्य संमेलनाचे आयोजन

कासा, ता. १ (बातमीदार) : डहाणू तालुक्यातील कासा येथे आदिवासी साहित्य, संस्कृती आणि बोली भाषेच्या जतन व संवर्धनाच्या उद्देशाने पहिल्यांदाच आदिवासी साहित्य संमेलनाचे आयोजन करण्यात आले आहे. अनुजा सेवा संस्था, कासा आणि आदिवासी साहित्य परिषद, पालघर यांच्या संयुक्त विद्यमाने येत्या रविवारी (ता. ५) कासा ग्रामपंचायतीच्या बिरसा मुंडा हॉलमध्ये हे संमेलन पार पडणार आहे.

या संमेलनाच्या अध्यक्षपदी ज्येष्ठ साहित्यिक देवचंद महाले यांची निवड करण्यात आली असून, कार्यक्रमासाठी प्रमुख पाहुणे म्हणून डहाणूचे आमदार विनोद निकोले, बोईसरचे आमदार विलास तरे, पालघरचे आमदार राजेंद्र गावित, माजी आमदार अमित घोडा तसेच माजी जिल्हा परिषद अध्यक्षा व अनुसूचित जमाती सदस्य वैदेही वाढाण उपस्थित राहणार आहेत. कार्यक्रमाचे सूत्रसंचालन प्रा. सुधीर भोईर करणार आहेत.
संमेलनाच्या पहिल्या चर्चासत्रात ‘आदिवासी साहित्य व बोली भाषेचे संवर्धन आणि विकास’ या विषयावर सखोल चर्चा होणार आहे. या सत्रात सुनील झळके, सखाराम डाखोरे, नितीन बोंबाडे आणि डॉ. किशोर डोके हे साहित्यिक सहभागी होणार असून, सत्राचे सूत्रसंचालन रवि बुधर करणार आहेत.

त्यानंतर दुसऱ्या सत्रात कविसंमेलनाचे आयोजन करण्यात आले असून, या संमेलनाचे अध्यक्ष कवी रवि बुधर असतील, तर सूत्रसंचालन कवी किशोर डोके करतील. या सत्रासाठी ममता गडग, माया खोटरे, चेतन अंधेर, कृष्णा राऊत, ज्ञानेश्वर गावित, विशाल भोये यांच्यासह अनेक कवी सहभागी होणार आहेत. या संमेलनामुळे आदिवासी साहित्य आणि संस्कृतीला नवी दिशा मिळणार असून, स्थानिक कलाकार व साहित्यिकांना व्यासपीठ उपलब्ध होणार असल्याची अपेक्षा व्यक्त केली जात आहे.