नवी मुंबई, ता. १ (वार्ताहर) : शहरात सोनसाखळी लुटारूंनी पुन्हा एकदा डोके वर काढले असून, अवघ्या ४८ तासांत कोपरखैरणे आणि रबाळे पोलिस ठाण्याच्या हद्दीत तीन महिलांच्या अंगावरील सुमारे पाच लाख ३० हजारांचे सोन्याचे दागिने लुटून नेल्याचे उघडकीस आले आहे. या लुटारूंनी मॉर्निंग वॉकला जाणाऱ्या आणि कामावरून घरी परतणाऱ्या महिलांना लक्ष्य केल्याचे दिसून येत आहे.
घणसोली सेक्टर ७ मध्ये राहणारी विवाहित रविवारी (ता. २९) रात्री सेक्टर ९ मधून शिक्षिकेकडून पुस्तके घेऊन मुलीसह घरी जात होती. ती मोरया ज्वेलर्ससमोरून जाताना, दुचाकीवरून आलेल्या दोघा लुटारूंनी विवाहितेच्या मानेवर जोरात थाप मारून हिसका दिला. तसेच तिच्या अंगावरील दोन लाख ५५ हजारांचे मंगळसूत्र लुटून पलायन केले. त्यामुळे विवाहितेच्या मानेला गंभीर दुखापत झाली आहे. याप्रकरणी रबाळे पोलिस ठाण्यात गुन्हा दाखल आहे.
बोनकोडे गावातील चंद्रमा सोसायटीसमोर सोमवारी (ता. ३०) सकाळी फिर्यादी महिला कामावर जाताना स्कुटीवरून मास्क लावून आलेल्या दोघा लुटारूंनी तिच्या गळ्यातील दोन लाख ३० हजारांची सोन्याची चेन हिसकावून पळ काढला. तिसरी घटना मंगळवारी (ता. ३१) रात्री कोपरखैरणे सेक्टर ९ येथील एकता हाउसिंग सोसायटीसमोर घडली. फिर्यादी महिला आपल्या नातेवाइकासह शॉरमा खाण्यासाठी थांबली असताना, पायी आलेल्या एका लुटारूने त्यांच्या गळ्यातील दीड लाखाची सोन्याची चेन खेचली. त्यानंतर मोटारसायकलवर दबा धरून बसलेल्या आपल्या साथीदारासह पळून गेला. या तिन्ही घटनांमध्ये पोलिसांनी गुन्हे दाखल केले आहेत. कोपरखैरणे आणि रबाळे पोलिसांनी घटनास्थळावरील सीसीटीव्ही फुटेज आणि तांत्रिक पुराव्यांच्या आधारे संशयितांचा शोध घेण्यास सुरुवात केली आहे.