घर खरेदीदारांना अनिश्चित काळापर्यंत ताटकळत ठेवू शकत नाही: उच्च न्यायालय

ग्राहकाला पैसे काढण्याची
सशर्त परवानगी कायम

लवादाच्या निर्णयावर न्यायालयाचे शिक्कामाेर्तब

सकाळ वृत्तसेवा
मुंबई, ता. १ : विकसकाने अपील दाखल केल्याच्या कारणास्तव सदनिका वाटप झालेल्या व्यक्तीने भरलेले पैसे अडकवून ठेवता येणार नाहीत. त्याला अनिश्चित काळापर्यंत ताटकळत ठेवता येणार नाही, असे निरीक्षण नुकतेच उच्च न्यायालयाने नोंदवून अपीलीय लवादाचे आदेश कायम ठेवले.

कराराला ११ वर्षे झाली असून, ताबा देण्याच्या आश्वासित तारखेलाही सात वर्षे झाली आहेत. त्यासाठी सदनिका खरेदी करणाऱ्याने माेठी रक्कम भरली आहे. त्यामुळे न्यायाधिकरणाचा निर्णय विवेकपूर्ण आणि तर्कशुद्ध असल्याचे न्या. एन. जे. जमादार यांनी ‘रेअर टाउनशिप्स प्रायव्हेट लिमिटेड’ने दाखल केलेले हे अपील फेटाळताना नमूद केले. सदनिका खरेदीदार मितुल गाडा यांना विकसकाकडे जमा केलेली रक्कम काढून घेण्याची परवानगी अपीलीय लवादाने दिली हाेती. ती कायम ठेवताना विकसकाला (डेव्हलपरला) खटल्यात यश आल्यास ही रक्कम व्याजासह परत करण्याच्या हमीवर ही परवानगीची अटही न्यायालयाने कायम ठेवली.

गाडा यांनी २०१५मध्ये नॉर्थ सी हाइट्स (ए१) या प्रकल्पातील १९व्या मजल्यावरील दोन सदनिकांचे बुकिंग केले होते. विक्रीचा करार २ नोव्हेंबर २०१५ला करण्यात आला. ३१ डिसेंबर २०१८ पर्यंत सदनिकांचा ताबापत्र देण्याचे आश्वासन देण्यात आले होते. १.६० कोटींहून अधिक आणि १.५६ कोटींहून अधिक किंमत असलेल्या या सदनिकांसाठी गाडा यांनी अनुक्रमे ९८.९२ लाख आणि ६९.६६ लाख रुपये रक्कम भरली आहे.
---